Tatay binato ng anak sa ulo dahil di pinayagang pumunta sa disco

Sugatan ang isang ama matapos masapul ng bato ng kanyang anak sa Brgy. Laserna, Nabas.

Kinailangang dalhin sa ospital ang 56 anyos na biktimang si Richard Saligumba dahil sa tinamo nitong sugat sa ulo nang batuhin ng kanyang anak.

Batay sa ulat, nangyari ang insidente alas-7 ng gabi nang pilitin ng kanyang 21 anyos na anak na pumunta sa isang sayawan sa Toledo.

Pero dahil lasing na ito, di pumayag ang ama na umalis ang anak.

Ikinagalit ito ng kanyang anak kaya kumuha ito ng bato at ibinato sa kanya.

Hindi na nakailag ang biktima dahilan ng kanyang tinamong sugat, kasalukuyan na rin itong nagpapagaling sa ospital.