Babae, arestado dahil umano sa pang-aabuso ng mga bata online

Arestado ang isang babae sa isang anti-child pornography entrapment operation na ginanap sa Barangay Luz, Cebu City ngayong araw, Hulyo 13, 2022.

Nasagip din sa naturang operasyon ang walong bata kabilang na ang isang apat na buwang sanggol.

Suspek ang babae sa pang-aabusong sekswal ng mga kabataan sa internet. Ayon sa intel, pinapasali umano ang mga bata sa mga live show. Kinukunan din umano sila ng litrato nang walang saplot at ibinibenta ang mga larawan sa mga foreigners.

Bago pa man ang pandemya ay minumonitor na ng mga otoridad ang mga aktibidad ng suspek subalit natigil ito dahil sa kasagsagan ng COVID-19. Naulit ang kanyang operasyong kamakailan lang.

Isinagawa ng Women and Children’s Protection Desk ng Police Regional Office-Central Visayas ang nasabing operasyon sa pakikipagtulungan ng Regional Anti-Cyber Crime Unit-Central Visayas, Department of Social Welfare and Development-Central Visayas, Cebu City Police Office at Department of Justice.