6 sachet ng droga, nakuha sa kotse ng lalaking dinakip matapos takbuhan ang mga pulis sa checkpoint

Nakuhaan ng 6 na sachet ng droga ang lalaking hinuli ng mga kapulisan sa Balactasan, Madalag matapos magpahabol sa mga kapulisan sa isang checkpoint.

Sa ikinasang search warrant operation kagabi, binuksan ang kotse ng suspek na si Delsol Zunio Jr., 35 anyos ng Polo, Banga at doon nakuha ang apat na droga na nakalagay sa isang kaha ng sigarilyo at dagdag na dalawang sachet na nakapatong sa speedometer ng sasakyan at aluminum foil.

Magugunitang, hinuli kahapon ang suspek matapos magpahabol sa checkpoint ng Banga PNP at muntik pang makasagasa ng mga kapulisan nitong gabi ng Lunes.

Sa incidental search, nakuha sa suspek ang isang tooter, P23,000 cash at iba’t-ibang mga ID.

Kulong na ngayon ang suspek na mahaharap sa patong-patong na mga kasong paglabag sa RA 9165, Disobedience to an Agent or Person in Authority at Reckless Driving.