Higit P200K na halaga ng shabu nasamsam sa 2 drug personality sa Roxas City

Nasamsam ng mga kapulisan ang nasa P217, 600 na halaga ng shabu sa dalawang drug personality na na buy bust kahapon sa Brgy. Dinginan, Roxas City.

Kinilala ang mga suspek na sina Junerod Jamili, 39 anyos, isang technician na taga Barangay VII at ang kasama nitong babae na si Anjhell Dellotay, 23 anyos na taga Brgy. Punta Tabuc, Roxas City.

Sa pangunguna ni PMaj. Leomindo Tayupon ng PDEU Capiz at PLtCol. Aaron Palomo, COP ng Roxas City PNP, tuluyang nadakip ang mga suspek na matagal na nilang minamanman dahil sa pagsusupply ng mga ito ng droga sa Punta Tabuc.

Nakuha sa posisyon ng dalawa ang isang malaking sachet ng shabu kapalit ng P7000 na buy bust money at dagdag na 11 sachet ng pinaghihinalaang shabu na may bigat na 32 gramo at tinatanyang nagkakahalaga ng P217,600.

Nabatid na ang dalawang suspek ay nakulong na sa kasong may kaugnayan sa droga at nakalaya matapos na mag-avail ng plea bargaining.

Ayon kay LtCol Palomo, mababawasan na ang mga supplier ng drugs sa Punta Tabuc dahil sa pagkkakdakip sa dalawa.