Lalaki, sinaksak ng kainuman

Sugatan ang isang lalaki matapos umanong saksakin mag-aalas 9:00 kagabi sa Polo, New Washington.

Nakilala ang biktimang si Ronron Veric, 35 anyos ng nasabing lugar, habang nakilala naman ang suspek na si Burc Vincent Natal, sa legal na edad at residente naman ng Poblacion, New Washington.

Base sa inisyal na imbestigasyon ng New Washington PNP, kapwa naroon at nag-iinuman sa isang birthday celebration ang biktima at suspek nang mangyari ang insidente.

Bigla na lamang umanong sinuntok ng suspek ang biktima sa mukha sa hindi pa malamang dahilan.

Tumakas umano ang biktima, subalit hinabol pa umano ito ng suspek at sinaksak gamit ang hindi pa natukoy na patalim.

Sinubukan namang sanggain ng biktima ang pananaksak ng suspek, ngunit tinamaan pa rin ito sa kanang dibdib.

Kaagad tumakas ang suspek, habang nagawa pang magmaneho ng motorsiklo ng biktima para magreport sa New Washington PNP station.

Kaagad din siyang dinala sa ospital, ngunit tumanggi na itong magpa confine dahil mababaw lamang umano ang kanyang tama.

Patuloy namang pinaghahanap ng mga pulis ang suspek.