Proteksyon para sa mga ‘Ander’, isinusulong sa Kamara

Bibigyang-proteksyon na ang mga “ander de saya” o ang mga mister na nakararanas ng pagmamalupit mula sa kanilang mga misis. 

Sa House Bill 4888 na isinusulong ni Rizal Rep. Fidel Nograles, pinapaamyendahan niya ang RA 9262, o ang Anti-Violence Against Women and their Children at gagawin itong Anti-Violence Against Partners and their Children upang  maisama na ang pagmamalupit sa mga lalaki.

“This bill shall prohibit all forms of violence against partners and their children, in private and public life, and provides maximum protection and effective remedies for victims and punishment of offenders,” ani Nograles.

Sinabi pa ni Nograles na kailangan ding isaalangalang ang kapakanan ng mga kalalakihan na nakararanas ng pang-aabuso ngunit hindi makapag-report dahil sa takot na makutya.

“The bill is really just a tweak to improve what has been an excellent mechanism to protect the Filipino family,” dagdag pa ng kongresista. “Violence and abuse do not discriminate“.

Hindi lamang abused husbands, kundi pati mga abused members ng LGBT community ang bibigyan ng proteksyon sa nasabing panukala. 

“Babae man o lalake, at miyembro ng LGBT, may suffer from the deleterious effects of an abusive relationship. It’s government’s duty to protect everyone,” ayon pa kay Nograles.

Saklaw sa panukala ang electronic violence upang maparusahan din ang mga gumagamit ng pekeng social media account upang mang-intriga o manakit ng damdamin ng iba.

“Sakop po nito iyong cyber bullying, mga online forms of violence, paggawa ng fake accounts sa social media para paninirang-puri,” aniya.