MOTORSIKLO NABANGGAAN NG SASAKYAN SA PANITAN, CAPIZ, DALAWA SUGATAN

Sugatan ang dalawang lalaki matapos mabanggaan ng isang sasakyan ang kanilang sinasakyang motorsiklo sa Sitio Banta-aw, Panitan, Capiz.

Kinilala ang mga biktima na sina Christian Velano, 25-anyos, driver ng motorsiklo, at angkas nito na si Peter Paul Daria, 18, parehong mga residente ng Brgy. East Villaflores, Maayon.

Habang kinilala naman sa report ng Panitan PNP ang suspek na si Ronaldo Bedo, 38, residente ng Brgy. Agloway, Panitan.

Ayon sa report ng kapulisan, binabaybay ng mga biktima ang kahabaan ng main road sakay ng motorsiklo mula sa Brgy. Bailan, Pontevedra pauwi sa kanila nang maganap ang aksidente.

Nabanggaan ang kanilang motorsiklo sa kanilang likuran ng kasunod na sasakyan na menamaneho ng suspek.

Nagtamo ng sugat sa iba-ibang bahagi ng katawan ang mga biktima matapos silang matumba sa sementadong kalsada. Dinala sila sa ospital para gamotin.

Boluntaryong sumuko sa kapulisan ang suspek. (with report from KaTodo Butchoy Gardose)