Capiz Medical Society, mga business group, gustong isailalim sa MECQ ang Capiz

Umaapela ngayon ang Capiz Medical Society (CMS) at Capiz Halaran Chamber of Commerce and Industry na itaas sa Modified Enhanced Community Quarintine ang probinsiya.

Sa kanilang joint resolution 2021-001, nanawagan ang dalawang grupo na higpitan ang quarantine protocols sa buong probinsiya at sa lungsod ng Roxas.

Nabatid na Huwebes ng nakaraang linggo, ay nakipagpulong ang dalawang grupo sa mga kinatawan ng pamahalaang lokal ng Roxas City at ng probinsiya kaugnay sa estado ng COVID-19 rito.

Ipinakita ng health sector sa nasabing pagpupulong ang patuloy na pagtaas ng kaso ng COVID-19 dito sa lungsod at sa buong lalawigan simula noong Abril.

Nakasaad rin sa kanilang resolusyon na ang Roxas Memorial Provincial Hospital ay umabot na sa full capacity nito, maging ang apat na pribadong mga ospital sa syudad.

Puno narin ang mga Temporary Treatment and Monitoring Facilities (TTMF) ng probinsiya ng lungsod.

Sinabi rin dito na mataas ang mortality rate ng lungsod (4.6%) kaysa sa nasyonal (1%) dahil sa nasabing sakit.

Nasa kritikal narin anila ang ilang mga pangangailangan gaya ng man power, mga gamot, rebreathing mask at mga ventillators.

Binaggit sa resolusyon na ang dalawang linggong time-out ay magbibigay daan anila sa pag-organisa sa health sector at maging sa nagpapatuloy na vaccination program.

Ang resolusyon ay nilagdaan nina Dr. Jocelyn Sio-Mosquete, CMS President, at Dale Bernas, president ng nasabing business group.