KAPOTODA TUTOL SA BAGONG FARE MATRIX NG MGA TRAYSIKEL SA BAYAN NG KALIBO

Hindi pabor ang Kalibo Poblacion Tricycle Operators and Drivers Association (KAPOTODA) sa bagong ipinalabas na fare matrix ng  Sangguniang Bayan para sa mga pumapasadang traysikel sa bayan ng Kalibo.

Sa panayam ng Radyo Todo kay Gervy Ibarra, acting president ng KAPOTODA, sinabi nito na masakit sa kanilang damdamin bilang mga drayber at operators ang nasabing bagong taripa.

Aniya, hindi sila ipinatawag noong nagsagawa ng public hearing para sa nasabing fare adjustment.

Pahayag ni Ibarra na mula sa P15 pesos ay naging P12 pesos nalang ang pamasahe mula sa Poblacion proper patungong capitol area, eastern terminal at cardinal sin avenue.

Dahil dito, umaapela si Ibarra sa Sangguniang Bayan lalo na kay SB member Matt Aaron Guzman, ang may hawak sa komitiba ng transportasyon na kung maaari ay ibalik nalang sa dating presyo ng pasahe na sampung piso para sa Poblacion area at P15 pesos naman sa labas ng Poblacion, Kalibo.

Mahirap din umano para sa kanilang ang magsakay ng limang pasahero gayundin na lubos silang naaapektuhan ng oil price hikes sa bansa.

Ang KAPOTODA ay mayroong mahigit 1,835 na miyembro ng mga drayber at operators na siyang pumapasada sa bayan ng Kalibo.