BABAE SUGATAN MATAPOS MAHAGIP NG MOTORSIKLO ANG KANIYANG BISIKLETA

Sugatan ang isang 18-anyos na babae matapos mahagip ng motorsiklo ang sinasakyan nitong bisikleta sa Brgy. Cagay, Roxas City.

Kinilala ang biktima na si Dahlia Anazario, residente ng Sitio Bangbang sa nasabing barangay.

Kinilala naman ang driver ng motorsiklo na si Rusi Mojo 200 na si Mark John Fernando, 23, isang electrician, residente ng Brgy. Tanque, Calubihan sa lungsod ring ito.

Ayon sa report ng Roxas City PNP, Miyerkoles ng hapon habang nagbibisikleta ang biktima mula sa kanilang bahay patungong circumferential road sa nasabing barangay nang mahagip siya ng kasunod na motorsiklo.

Dahil sa aksidente, nagtamo ng sugat sa iba-ibang bahagi ng katawan ang biktima. Agad itong isinugod ng rumespondeng mga tauhan ng Capiz Emergency Response Team sa isang pribadong ospital.

Nangako naman ang nakahagip sa biktima na magbibigay ito ng tulong pinansiyal.

Iniimbestigahan pa ng kapulisan ang aksidente.