Misis, nadukutan sa loob ng grocery store, mahigit P11k na laman ng pouch natangay

Nagpapatuloy pa ang imbestigasyon ng Banga PNP sa nangyaring pandurokot sa isang misis kahapon ng umaga sa Poblacion, Banga.

Ayon sa Banga PNP, humigit-kumulang P11,500.00 umano ang perang laman ng pouch ng biktimang si Alma Gumban, 46 ng Bacan, Banga, maliban pa sa ATM at driver’s license nito.

Ala 1:45 na kahapon ng hapon nagpa blotter ang biktima matapos umanong madukutan sa loob ng isang grocery store sa Poblacion, Banga, bandang alas 10:00 ng umagang iyon.

Base sa report, namimili noon ang biktima, ngunit huli na nang matuklasang wala na ang kanyang pouch nang magbabayad na sana ito sa counter ng kanyang mga pinamili.

Samantala, patuloy namang tinututukan ng Banga PNP ang ibinahaging post sa social media na kuha umano sa loob ng grocery store kung saan namili ang biktima.