FORMER MAYOR WILLIAM LACHICA, PANATAG NA MANANALO SA PAGKAGOBERNADOR SA DARATING NA HALALAN

Panatag si dating Kalibo Mayor William Lachica na mananalo ang kanyang hanay sa darating na eleksyon.

Ngayong araw, Oktubre 8, naghain na ng Certificate of Candidacy si Lachica para sa pagkagobernador ng Aklan.

Kasama niyang nagfile ng COC sa COMELEC province dakong alas-9:00 kaninang umaga ang kanyang running mate na si incumbent board member Atty. Noli Sodusta para sa pagka bise gobernador.

Naroon din si Batan Mayor Rodell Ramos na tatakbo naman bilang kongresista sa unang distrito ng Aklan.

Sa panayam ng Radyo Todo kay Lachica, sinabi niya na sisiguruhin na nilang mananalo ang kanilang partido sa darating na national at local elections 2022.

Aniya, nakumpleto na ang kanilang kandidato sa board members na pambato sa una at ikalawang distrito ng Aklan kaya tiwala ito na makakamit na nila ngayon ang pagkapanalo.