31 anyos na lalaki patay nang pagsasaksakin sa harap ng isang tindahan

Duguan at nakaupo sa kalsada nang maabutan ng mga kapulisan ang isang lalaking nasawi sa pananaksak sa may harap ng isang tindahan kagabi sa Brgy. New Buswang, Kalibo.

Kinilala ang biktimang si Jaheel Custodio, 31, ng Brgy. Talon, Altavas na kasalukuyang nakatira sa Brgy. Andagao, Kalibo habang ang suspek ay kinilalang si Janeray Yacub, 35, ng Bulwang, Numancia.

Batay sa kuha ng CCTV mula sa Polido Store, makikitang may binibili ang biktima sa tindihan nang dumating ang suspek.

Pinaniniwalaang nagkaroon ng argumento ang dalawa hanggang sa hinabol ng suspek ang biktima at pinagsasaksak sa kaliwang dibdib, likod at binti.

Dinala pa sa ospital ang biktima pero idineklara itong patay ng doktor.

Samantala, kusa namang sumuko ang suspek sa Numancia PNP station.