Naaagnas na bangkay ng isang lolo, natagpuan sa Brgy. Palale, Banga

NAAAGNAS na ang bangkay ng isang lolo nang matagpuan ito sa Barangay Palale sa bayan ng Banga nitong Lunes.

Ang biktima ay kinilalang si Jaime Sumundang, 59, tubong Mindanao at kasalukuyang naninirahan sa nabanggit na lugar.

Ayon sa mga apo ng biktima, may limang araw ng hindi nakaka-uwi sa kanyang bahay ang kanilang lolo.

Anila, pabalik-balik na sila sa bahay ng biktima sa pag-asang madadatnan nila ito.

Inakala umano nila na nagtrabaho ito sa kalapit barangay kung kaya’t hindi pa nakaka-uwi.

Sinubukan din nilang hanapin ang kanilang lolo sa pamamagitan ng pag-post sa Facebook subalit wala naman silang natanggap na impormasyon tungkol sa biktima.

Nitong Lunes ng hapon lamang ng mag-report ang may-ari ng lupa sa mga kapulisan na may natagpuang bangkay sa kanilang lote.

Agad namang rumesponde ang Banga PNP at dito na nakumpirma nga mga apo ng biktima na bangkay nga ito ng kanilang lolo.

Nagpapatuloy pa ang imbestigasyon ng mga awtoridad upang nalaman ang ikinamatay ng biktima.