Anak ng pulis, nawalan ng malay at isinugod sa ospital matapos na masampal ng tanod

Nawalan ng malay ang isang 16 anyos na binata matapos mauntog ang ulo sa semento nang sampalin ng isang tanod sa Brgy. Castillo, Makato.

Batay sa ulat, nagpapahinga ang biktima sa waiting shed ng plaza matapos maglaro ng basketball nang lapitan ito at sinampal ng Brgy. Tanod na si Ryan Aguarino, 30 anyos, residente ng nabanggit na barangay.

Tumama ang ulo ng biktima sa semento kaya nawalan ito ng malay at dinala sa ospital.

Ayon naman sa tanod na si Aguarino, pamangkin niya ang biktima at pinsan niya ang ama nito na isang pulis.

Depensa niya, pareho silang nakainom ng kanyang pamangkin dahil kaarawan ng kanilang lola.

Nagkakantiyawan umano sila at nagbibiruan dahil broken hearted ang biktima at hindi nito sinasadya na masampal ito ng malakas.

Nagkaayos naman umano sila matapos siyang magbigay ng P5000 na pandagdag sa gastusin ng pagpapagamot sa biktima.