Kamara kumilos laban sa Kartel ng Sibuyas: Mga Sangkot, Tutugisin!

Sa pahayag kahapon, siniguro ni Speaker Ferdinand Martin Romualdez sa publiko na tututukan ng Kamara de Representantes ang mga indibidwal na sangkot sa manipulasyon ng presyo ng sibuyas noong 2022.

“Ang mga kasama sa solusyon, tutulungan namin; ang mga kasama sa problema, hindi namin palalampasin. Tutugisin namin sila at magbibigay ng angkop na rekomendasyon para sa usigin,” ayon kay Romualdez.

Naganap ang pahayag na ito kasunod ng pagpupulong nila ng mga pangunahing mambabatas, kabilang ang chairman ng komite sa agrikultura at pagkain, Rep. Wilfrido Mark Enverga, at iba pang opisyal ng Bureau of Plant Industry (BPI).

Ang komite ni Enverga ay nagsagawa ng siyam na pagdinig ukol sa mga paratang ng pag-smuggle at hoarding ng sibuyas, na nagtaas ng presyo nito simula ₱400 hanggang ₱700 kada kilo noong 2022.

Inilantad naman ni Rep. Stella Quimbo ang mga taktika ng kartel — na mayroong isang korporasyon na kontrolado ang lahat ng bahagi ng industriya ng sibuyas.

Bukod kay Enverga at Quimbo, naroon rin sa pulong ang chairman ng komite sa appropriations na si Rep. Elizaldy Co at Rep. Michael John Duavit. Ang delegasyon ng BPI ay pinamunuan ni Director Gerald Glenn Panganiban.

Sinabi ni Romualdez na pinahahalagahan ni Pangulong Ferdinand Marcos Jr., na kasalukuyang Kalihim ng Kagawaran ng Agrikultura, ang imbestigasyon ng Kamara.

“Naiintindihan niya na tinutulungan namin siya bilang Kalihim ng Agrikultura na masugpo ang mga ganitong maling gawi,” sabi ni Romualdez.