LASING NA NAKIPAGTALO SA KAINUMAN KUNG SINO SA ENGINEER AT ARCHITECT ANG GUMAGAWA NG PLANO, TINAGA

Numancia – Tinaga sa ulo ang isang lasing matapos umanong makipagtalo sa 2 kainuman sa kung sino sa architect at engineer ang gumagawa ng plano.

Nangyari ang insidente bandang alas 8:00 kagabi sa Badio, Numancia, kung saan nakilala ang biktimang si Policarpio Cipriano, habang nakilala naman ang dalawang suspek na kanya ring kainuman na sina George Ramos, at Alex Caynap, lahat 53 anyos at residente ng nasabing lugar.

Sa panayam ng Radyo Todo sa mga suspek, sinabi ni George na silang dalawa ng biktima ang nagtalo kung saan tinawag umano sila ng biktima na mga bobo.

Ayaw umano kasing maniwala ng biktima na pareho lamang na architect at engineer ang gumagawa ng plano, kung kaya’t pinauwi nito ang biktima.

Subalit nagpatuloy umano ang kanilang pagtatalo hanggang sa nagsuntukan at nagpangbuno ang dalawa, na kaagad namang inawat ni Alex.

Hindi pa rin umano tumigil ang dalawa kung kaya’t kumuha ng itak si Alex at tinaga sa ulo si Cipriano.

Mabilis naman itong dinala sa ospital, habang kaagad namang naaresto si Ramos.

Tinugis rin ng mga pulis ang tumakas na si Alex, subalit pasado ala 1:00 kaninang madaling araw nang sumuko umano ito sa Numancia PNP.

Kapwa sila naka kustodiya sa presento ng pulis habang inihahanda ang kasong Frustrated Homicide na isasampa laban sa kanila.