Technician, nabagsakan ng elevator, kritikal

Kasalukuyang nasa kritikal na kalagayan ang isang technician nang mabagsakan ng elevator na kinukumpuni niya sa Malabon City.

Ang biktima ay kinilalang si Renato Apostol, 62, at residente ng Paraiso Street. Brgy. 97. Tondo, Maynila.

Ayon sa ulat ng Malabon City PNP, ang insidente ay naganap kahapon, bandang alas- 4:40 ng hapon  sa loob ng Whizmo Garments Corporation sa Victoneta Ave, Brgy. Potrero, lungsod ng Malabon.

Kinukumpuni umano ng biktima at ng mga kasama nito ang elevator ng naturang pabrika nang biglang may magbara. Tinawag ng may-ari ng pabrika ang biktima para alamin kung saan nagmumula ang problema.

Tumalima naman si Apostol  at sinilip ang ilalim ng elevator. Inalog umano ng biktima ang elevator at dito na biglang bumagsak ang elevator at tinamaan ang biktima sa ulo at balakang.

Agad namang naisugod  sa MCU Hospital si Apostol  at  nalapatan ng paunang-lunas. Kasalukuyang inoobserbahan ngayon ng mga manggagamot ang kaniyang kondisyon.