Magsasaka, patay matapos na masaksak ng kainuman gamit ang sariling patalim

Patay ang isang magsasaka matapos na masaksak ng kanyang kainuman gamit ang kanyang sariling patalim sa Sitio Bota, Brgy. Cortes, Balete.

Kinilala ang biktimang si Junito Cuadrante, nasa legal na edad, habang suspek naman ay natukoy bilang si Francis Dominguez, 33 anyos, kapwa mga residente ng nabanggit na lugar.

Batay sa paunang imbestigasyon, nag-inuman ang dalawa sa bahay ng suspek kasama ng tatlong iba pa na nauna nang nagsiuwian.

Kalaunan ay kinuha ng biktima ang kanyang patalim at sumigaw umano ng “Pamatyon ta kamo”.

Doon na nagsimulang magtalo ang dalawa hanggang sa naagaw ng suspek ang patalim sa biktima at pinagsasaksak ito sa iba’t-ibang bahagi ng katawan na naging dahilan ng kanyang pagkamatay.

Posibleng maharap sa kasong Homicide ang suspek na kusa namang sumuko sa pulisya at kasalukuyan nang nakakulong.