Mag-asawa pinagtataga, mister patay

Kalunos-lunos ang sinapit ng mag-asawa matapos silang pagtatagain ng kanilang kapitbahay kagabi sa Brgy. Janlud, Libacao.

Kinilala ang mag-asawang biktima na sina Cherry Ann Gregorio, 42, at Lorjei Gregorio, 44, mga residente ng nabanggit na barangay.

Batay sa ulat, naghahapunan ang mag-asawa at tatlo nilang anak nang pasukin sila ng suspek na si Jomar Esto at pinagtataga.

Batay sa nanay ni Cherry Ann na si Juanita Salazar, pagdating niya sa bahay ng mga ito, nadatnan niya ang mag-asawang magkatabing naliligo sa dugo.

Naabutan pa niyang humihinga si Lorjei pero kalaunana ay binawian din ito ng buhay dahil sa mga tinamo nitong tama ng pananaga sa mukha at ulo.

Isinugod naman sa ospital ang asawa nito dahil halos maputol na ang kanang kamay nito na posibleng ginamit niya para saluhin ang mga taga para maprotektahan ang kanyang mister.

Pinaghahanap pa ngayon ng mga kapulisan ang suspek na tumakas.