Kawatan na nanloob sa tindahan para sa gatas ng kanyang anak, huli sa patibong

Mangiyak-ngiyak na nagmakaawa ang isang kawatan matapos na mahuli sa kanyang ikaapat na tangkang pagnanakaw sa isang tindahan sa Brgy. Mobo, Kalibo.

Nagmakaawa pa ang nasabing suspek at nagpaliwanag na gatas lang sana ng kanyang anak ang kanyang kukunin.

Sinasabing matagal nang binabantayan ng may-ari ng tindahan ang suspek dahil makailang beses na itong nagnakaw doon.

Napag-alaman na sa unang beses nitong panloloob, nakuha umano nito ang isang sapatos. Sa pangalawang beses ay mga pera at sa pangatlo naman ay mga sigarilyo.

Dahil dito, naisip ng bayaw ng may-ari na maglagay ng isang patibong na gawa sa tali at lata na kapag nasagi ay tumutunog.

Dito na nahuli ang suspek kaninang madaling araw matapos nitong masagi ang tali at tumunog ang mga lata.

Dahil sa takot ay kumaripas ng takbo ang suspek papuntang taniman ng mga mais.

Kaugnay nito, nakita naman ng mga tao sa lugar ang motor ng suspek kaya kinuhaan nila ito ng ilang bahagi para hindi na makatakbo.

Bumalik naman ang suspek sa kaniyang motor at doon na ito tuluyang nahuli at dinala sa Kalibo PNP station para sa kaukulang disposisyon.