7 sugatan, kabilang ang 5 estudyante at buntis sa salpukan ng SUV at traysikel

Pito ang sugatan kabilang ang limang estudyante at isang buntis sa salpukan ng isang SUV at pampasaherong traysikel bandang alas 12:00 nitong tanghali sa crossing diversion road sa Poblacion, Makato.

Kasalukuyang ginagamot sa ospital ang mga biktima kasama na ang driver ng traysikel na si Ruthgar Amboboyog, 37 anyos ng Calangcang, Makato, habang nasa kostodiya naman ngayon ng Makato PNP ang driver ng SUV na si Oliver Sanidad, 48 anyos at residente ng Manduriao, Iloilo.

Nabatid na mga estudyante ng Aklan State University Makato Campus ang mga biktima na sina Jonabelle Tubao, 23 anyos ng Libang, Makato; Anally Garcia, 22 anyos ng Castillo, Makato; Reuben Trajico, 24 anyos ng Baybay, Tangalan; Sharmaine Joy Villanueva, 25 anyos ng Banaybanay, Malinao; at Rex Johnjam Desullan, 21 anyos ng Libertad, Antique at Janrey Lorenzo, 21 anyos ng Napatag, Tangalan.

Sa panayam ng Radyo Todo kay Sanidad, papunta siya ng Caticlan galing Iloilo nang bigla na lamang umanong sumulpot sa lugar ang traysikel rason na nagkasalpukan ang dalawa.

Bagama’t sinabi ni Sanidad na hindi mabilis ang kanyang pagpapatakbo, iginiit naman ng mga pamilya ng traysikel driver na mabilis ang kanyang takbo base na rin sa mga nakasaksi sa insidente.

Kaagad namang isinugod sa ospital ang mga biktima na nagtamo ng mga minor injuries at bali sa katawan, habang nakahanda naman umanong tumulong sa gastusin medikal ang driver na si Sanidad.