HABAL-HABAL DRAYBER NGA DATING DRUG SURRENDEREE, ARESTADO SA BUY BUST

Malay, Aklan – Arestado ro sangka habal-habal drayber nga dating drug surrenderee sa ginkasa nga buy-bust operation alas-5 kainang agahon sa isla it Boracay.

Ginkilaea ro suspek kay Jovanie Villanueva Toquero, alyas “Robin”, may edad nga 37-anyos, tumandok it Sagay City, Negros Occidental ag presenting naga istar sa sa Sitio Lugutan, Manocmanoc, Boracay.

Gin aresto ro suspek matapos nga mabak-ean it sangka sachet nga marijuana.

Nabuoe man sa anang posisyon ro P600 nga buy bust money kamana man ro 5 pa ka mga sachet it marijuana.

Aminado man ro suspek nga ginsueod na ro pagbaligya it marijuana bangod sa mataas nga kita.

Suno pa kay Robin, maabo pa nga mga habal-habal drayber nga nagagamit ag nagabaligya it marijuana sa mga turista.

Nasayuran nga kaeakip man si Robin sa mga suspek sa pila ka mga panakawan sa isla.

Kasong pagbayolar sa RA 9165 ukon Comprehensive Dangerous Drugs Act of 2002 ro igapasaka nga kaso kontra sa suspek.