Kalibo, Aklan – Tama sa waea nga hita ro naagum it sangka eaeaki nga ginbuno kabie sa Brgy. Tigayon sa banwa it Kalibo.
Nakilaea ro biktima nga si Freddie San Miguel, 33 anyos, ag ro suspek nga si Joy Fernandez Diego, 35 anyos, parehong mga residente it nasambitan nga lugar.
Ginasugid nga naga inuman sa baraka rong biktima kaibahan sanday Royden Barrera ag Joefel Alcaraz kat mag-abot ro suspek nga gabakae it sigarilyo.
Pero uwa it brand it sigarilyo nga anang ginausoy ro ginabaligya sa baraka.
Gin-inumukan it biktima rong suspek rason nga nagkainitan apang hapunggan ra it andang mga kaibahan.
Insigida man nga nagpanaw rong suspek hueam ro traysikel ni Barrera ag bumalik kun siin gintueop na rong biktima.
Nakadaeagan pa ro biktima apang haabutan it suspek ag ginbuno sa hita.
Padayon makaron nga ginabueong sa ospital si San Miguel samtang gin aresto it mga kapulisan ro suspek nga si Diego.
